عصام سامي ناجي
الأراضي للأسف
ناشفة وبور
وأتهدمت كل الجسور
والبحر هاج
واتعلقت كل الاماني
الميتة فوق السياج
والشعر مش لاقي العلاج
علشان مريض
والحكاية غريبة جداً
الفراخ عمالة تدن
والديوك قررت فجأة تبيض
*
الأراضي للأسف
مافيهاش خضار
والألم مش بيطرح
غير مرار
والبراءة من سنين
تحت الحصار
والضمير موجود صحيح
لكنه رايح المطار
علشان يسافر
والضياء عمال يعافر
عاوز يعيش
وأسماءنا مش موجودة
دايماً ع الأفيش
*
الأراضي للأسف
خالية أكيد م الحياة
واليأس في كل اتجاه
البسمة مالهاش أي حاجة
وأنا ألفت الكتاب
واللي باقي
المقدمة والديباجة
