هــــم خفيف

شعر: مراد ناجح عزيز

بفكر اعمل ..

زي اللي ما عملش زيّ ..

واحبّك بطول الغُنا

وبقُصر المسافة اللي مابين

 خطوتين على بلاطة واحدة

احبّك

زي أبطال القصص القديمة

وانتصار الحُب مش بسهولة

لكن اكيد

احبّك طفل ف سنه أولى

وعلى ايديك شَب

واتشعبط ف الحلم البعيد

بفكر اعمل ..

زي اللي ما عملش زيّ ..

عيّل شقي ..

شايل شنطته التّقيلة

وهم خفيف

لا راح ولا جِه

ولا قال ع الحلم صاحب وفي

ولا قال ع الدنيا بنت جميله,

والصّبر سكر زيادة

بفكر أتعلم من تاني امشي

واضحك

يمكن تقابلني صدفة ..

أيام السّعادة

……….

موجة بحر

على كتفي ليل

وف رجلي شوكة

وف قلبي موجة بحر ..

مش جايه

وف كل خطوة السكة

بتقصّر

وأقول قرّبت ..

من أول نقطة

ولآخر بيت ف القصيدة ..

كنت برتاح تحت ضله,

والهوا سلطان

غربة سنين العمر ..

بتودّعه

واستنى الرّاديو ف القهوة

وأغاني*(الست)

واللي مشيوا ف طريق الحب

وما قدروش يرجعوا

* سيّدة الغناء العربي( أم كلثوم)

…………

ناقِص ملـْــح

الحُب ..

صوت القصيده الحُر

جاي من بعيد ..

يقلق منام الجيوش

اكمنها ..

بتوزّع الأحلام ..

ف أوقات الفراغ

وتحرّض ع المقاومة,

والرسم بالألوان

والفرْح

الحًزن ..

أول إشارة للطير يسيب

الشجر

ويبقي المخيم وطن

والوطن يبقي غّربه

لو قالوا ضيّك ع السُّفره ..

ناقص ملْح

……….

مرسال

وحدك ف ليل ..

وبتلم ف حبالُه الشّبك

حواليك ..

غياب امك المفاجئ

وبنت الجيران

وكل مرسال اتفطم بينكم

ع الرجوع بأزمة

وحدك ف ليل ..

ابن 18 ف الأمل

ابن ستين غربة

وغياب

اتنين صحاب

شايلينك طول السّكه ..

خفيف

وشايلهم جبل ..

من كُتر ما اتعوّد عليهم

اتعوّد عليك اليأس ..

يكسّر المجاديف

………..

زيّك . زيّها

زيّها زيّك ..

ف النِدا عارفه اللي جايلك ..

بالرضا

واللي قال بُعدك قضى ..

ع الحلو من بَعدك

ومش راجع

واللي واقع تحت تأثير

إبتسامتك ..

ماخبّاش احتلاله بنظرتك

واشتياقه لحُضنها

زيِّك زيّها ..

واللي سابك سايبها

واللي صابك صايبها ..

سكة سفر

وغياب

وليال حُزن

كل مره بتتولد وتموت ..

بنفس الحُضن

…….