عصام سامي ناجي
ماشين في السكة إجباري
بنقاوم السم الهاري
وقمارنا في السما ساري
بينور لجميع التايهين
والشعر بيبكي وهو حزين
والضلمة عيارها صبح فالت
ولا فيش قدامنا طريق تالت
وقلوبنا مبدورة أنين
هنراهن لسة علي مين
ع الزيف الخائن وعمايله
ولا ع الهم اللي فؤادنا
أكيد شايله
وكلام ياما أنا
مش قايله
بعد ما اتصفت
أحلامنا في جميع الميادين
*
ماشين في السكة
م الأول
والوطن اللي عشقته
خلاص أتحول
أصبح مش هوه
وأنت شايله الحب
في قلبك من جوه
وعديت كل اللى عداه
وكنت في وقت
الشدة معاه
ولا عمرك قولت
دا كان قاسي
ولا حتى اتحولت سياسي
*
ماشين في السكة
وقلوبنا عماله تتكلم
من كتر ما صبرنا
خلينا الصبر
بذات نفسه اتعلم
وبقينا في الزاوية
ومافيش خيارات قدامنا
ورهنا النبض الباقي
في قلوبنا
ورهنا آخر أحلامنا
