عصام سامي ناجي
قاعد بتأمل أمشير
وأكتب أبيات شعر كتير
في مديح الحزن
البادي علي وشوشنا
واليأس بيمد دراعه ويحوشنا
وبتمشي وراه الجماهير
” وكليب ” راجع
أكيد من تاني
يقتل في بعير
والحرب بين الأفيال
مالهاش أي علاقة بالحق
ولا ليها علاقة بالتغير
حرب سيطرة ونفوذ
والحلم متصابي وعجوز
وكمان متقدم في السن
والورد مابقاش بيحن
والضي ملبوس م الجن
وعمال بيخرف
والنبض بجلالته اتحرف
والبرد بطل تدخين
وأنا وأنت هنلوم
علي مين
إذا كان بكرة
بسلامته قاسي وحزين
وأنا كاتب في الحب
أربع دواوين
الكل قال علي
قلبي خام
وبحب يا حبيبتي
وباهديك من قلبي سلام
وبوزع ع الدنيا
بواقي الأحلام
*
قاعد بتأمل في الحب
وقلت كمان للحزن “أستوب “
أوعاك تتجاوز
أي حدود
لسه الشعر هنا موجود
مش هيموت
الوجع الدامي مهما اسأسد
بكرة يفوت
