عصام سامي ناجي
قصايدنا هنكتبها لمين
والشعر أساساً مش صافي
الشعر هجين
ملعوب في أساسه
واليأس استولى
على روحه وداسه
صب له ويسكي
في كبايته وكاسه
عاوزه يتخلى عن
أهله في المحنة
وكمان يتخلى
عن ناسه
*
قصايدنا هنكتبها لمين
وحبيبتى مخاصماني
بقالها سنين
عاوزاني أقول في
عيونها قصايد ياما
والسكة أساساً مش باينة
ولا فيش قدامنا أي علامة
والنار لبسه جونتي في أيدها
ولبسه كمامة
وأنا لسه مشاهد “واسلاماه”
ونهاية من غير تشويق
محمود وجهاد لقيوا سلامة
بعد ما لف الدنيا وداخ
والتعلب دخل العشة
بيدور علي أي فراخ
والمبني أنهار تقريباً
علشان ناقصه مونى وسياخ
زعماء العالم اجتمعوا
وعملوا اتفاقية
للحد الأقصى من انبعاثات
ثاني أكسيد الكربون
“ماردونا” في كأس العالم
حط الكورة بإيده
في الجون
وأنا روحت امبارح أجيب ” أيفون “
من” طيبة جروب”
زي كل الناس
عندي ذنوب
وأوقات يبقى كلامي كويس
وأوقات تانية بيحدف طوب
في الأسواق الشعر
خلاص بقى مرغوب
علشان هو شبه المرهم
لو كان علي أرواحنا ندوب
*
العالم مش ماشي بكتالوج
ولا وفق الخطة المرسومة
وكتاكتنا سرقاهم البومة
وأنا حتى ما عنديش معلومة
لكن برضة عاوز يقول
الواقع مزمن ع الأخر
والمنطق أصبح مذهول
لو حبينا ننفى اليأس
فهيظهر له تاني فلول
