ناقِص ملـْــح

قصائد: مراد ناجح عزيز 

الحُب ..

صوت القصيده الحُر

 جاي من بعيد ..

يقلق منام الجيوش

اكمنها ..

بتوزّع الأحلام ..

ف أوقات الفراغ

وتحرّض ع المقاومة,

والرسم بالألوان

   والفرْح     

الحًزن ..

أول إشارة للطير يسيب

الشجر

ويبقي المخيم وطن

والوطن يبقي غّربه

لو قالوا ضيّك ع السُّفره ..

ناقص ملْح

………

هــــم خفيف

بفكر اعمل ..

زي اللي ما عملش زيّ ..

واحبّك بطول الغُنا

وبقُصر المسافة اللي مابين

الخطوة والتّانية

احبّك طفل

وعلى ايديك شَب

واتشعبط ف الحلم البعيد

مستني عنيه تفتّح

ويلاقي الدّنيا عيد ..

والهم خفيف

والحلم سكر زيادة

بفكر اعمل ..

زي اللي ما عملش زيّ ..

وأتعلم من تاني امشي

واضحك

يمكن تقابلني صدفة ..

أيام السّعادة

………..

زيّك . زيّها

……….

زيّها زيّك ..

ف النِدا عارفه اللي جايلك ..

بالرضا

واللي قال بُعدك قضى ..

ع الحلو من بَعدك

ومش راجع

واللي واقع تحت تأثير

إبتسامتك ..

ماخبّاش احتلاله بنظرتك

واشتياقه لحُضنها

زيِّك زيّها ..

واللي سابك سايبها

واللي صابك صايبها ..

سكة سفر

وغياب

وليال حُزن

كل مره بتتولد وتموت ..

بنفس الحُضن

……….

معمّر صوابعه

أنا بعترف ..

بالغُربة اللي ف غيابك

خلّتني طول الليل بفكّر ..

قد إيه م الوقت فاضل ..

لابتزاز أحلامي تهجر,

والوجع يفضل يشاور ..

على قلبي ومعمّر صوابعه ,

والغُنا صوت العديد

أنا بعترف ..

كان سهل جدًّا

يختلف كل اللي حاصل

ومااسبش باب ف القلب وارب ..

لعنيكِ

وعصابة م المطاريد

………..

موجة بحر

على كتفي ليل

وف رجلي شوكة

وف قلبي موجة بحر ..

مش جايه

وف كل خطوة السكة

بتقصّر

وأقول قرّبت لعيونك

وبقالي بيت ..

ارتاح تحت ضله

والهوا سلطان

غربة سنين العمر ..

بتودّعه

واستنى الرّاديو ف القهوة

وأغاني*(الست)

واللي مشيوا ف طريق الحب

وما قدروش يرجعوا

* سيّدة الغناء العربي( أم كلثوم)

……..

مرسال

وحدك ف ليل ..

وبتلم ف حبالُه الشّبك

حواليك ..

غياب امك المفاجئ

وبنت الجيران

وكل مرسال اتفطم بينكم

ع الرجوع بأزمة

وحدك ف ليل ..

ابن 18 ف الأمل

ابن ستين غربة

وغياب

اتنين صحاب

شايلينك طول السّكه ..

خفيف

وشايلهم جبل ..

من كُتر ما اتعوّد عليهم

اتعوّد عليك اليأس ..

يكسّر المجاديف

……….

نَعْـــــــــش

كِن ف مكانك ..

يمام

أحلام

غُنا

حُضن ايه ..

اللي انت مستني منّه الدفا ..

وطن

قلب مين ..

اللي قُلت ف عقل بالك

هو ده الناس

والسكن

أرض ايه ..

اللي انت مشتاق لها ؟!

انزل ودوق حزنها

انزل

وبّلغ سلامي للي قابلينك

واللي قابلوك ..

من غير بنادق رش

انزل وشوف ..

كل السكك واقفه لمرورك

وانت اللي طاير بجناحين ..

ف النعْش