
محب غبور
رئيس التحرير
لو أنت من سكان حلوان .. أو بتركب المترو .. أكيد قابلك اسم محطة “كوتسيكا”
أو زى ما بعض الركاب ينطقوها “كوزيكا” .. اسم غريب فعلا والأغرب منه أن المنطقة اللى فيها المحطة كلها اسمها “كوتسيكا”

مين بقا كوتسيكا ده اللى اتسمت على اسمه المنطقة ومحطة المترو “كوتسيكا ” خواجة يونانى اسمه بالكامل “ثيو خارى كوتسيكا” ماحدش عارف تاريخ وصوله لمصر .. ولا الظروف اللى خليته يسيب الأسكندرية اللى عايش فيها الجالية اليونانية بالكامل ويفضل يعيش فى القاهرة
ويبدأ فيها مشروعه الكبير وحلمه اللى خلاه عميد الجالية اليونانية وكمان من أغنى أغنياء مصر .. ثروته وصلت 4 ملايين جنيه سنة 1910 .. وقتها كان الجنيه المصرى أغلى من الجنيه الدهب
ليه بقا الخواجة “كوتسيكا” ساب الجالية اللى عايشة فى الاسكندرية من فترة طويلة واللى على أيديهم تزرع الزيتون الكلاماتا فى مصر .. واهتم بيهم “محمد على” جدا وشجعهم يزرعوا الزيتون فى اسكندرية ووجه بحرى .. ويتاجرون ويفتحوا محلات بقالة وغيرها .. واداهم تسهيلات كثيرة جدا
زى ما قلت لكم .. ماحدش عارف ليه الخواجة “كوتسيكا “
ما اشتغلش فى البقالة أو زراعة الزيتون .. لكن التاريخ بيسجل لنا أن المسيو “كوتسيكا” وصل القاهرة
وعاش فى منطقة بعيدة شوية عن طرة .. وفيها فتح مصنع جديد من نوعه سماه “مصنع السبرتو”.. و كان أول مصنع بيورد كحول لمصانع الكولونيا وللصيدليات والمستشفيات
مصنع السبرتو كان وش السعد على الخواجة كوتسيكا.. بقى غنى جدا ومشهور .. وتوسعت تجارته وتوسع مصنعة وبقي مليان عمال مصريين وايطاليين ويونانيين وفرنسيين
المصنع فضل ينتج السبرتو و يتطور يوم بعد يوم .. وبقا فيه خط لإنتاج الجلوكوز والنشا
ومع ثرائه الكبير .. الخواجة كوتسيكا لم ينس فضل مصر والمصريين عليه .. ازاى ؟
الراجل كان عامل تأمين صحى كامل لكل عمال مصنعه مصريين وأجانب .. وكان بيتبرع لكل المشروعات الخيرية .. وساهم فى بناء المستشفى اليونانى بالاسكندريه اللى كانت بتقدم خدمات صحية على أعلى مستوى وكان بيقول ان المستشفى دى بيرد بيها جزء من جمايل الاسكندرية عليه وعلى الجالية اليونانية
كمان ” الخواجة كوتسيكا” كان ليه دور كبير فى دخول مرفق الإسعاف لمصر .. وتبرع بأول سيارة إسعاف .. ودى كان لها حكاية تانية خالص .
“الخواجة كوتسيكا” كان له طقوس فى شغله .. أولها وأهمها أنه يبدأ العمل بجرس يضربه بنفسه .. وفى صباح يوم عمل عادى جدا فى سنة ١٩١٦ .. العمال دخلوا ولبسوا زى الشغل الرسمى وختموا كروت الحضور ووقف الكل فى مكانه مهندسين وعمال مصريين وأجانب فى انتظار اشارة البدء من الخواجة
دقيقة واحدة ووصل الخواجة كوتسيكا مكتبه اللى كان له واجهة إزاز بيشوف منها كل العمال والآلات .. بص واطمن أن كل حاجة فى مكانها ورن جرس بداية العمل
المصنع اتحول فى لحظة لخلية نحل .. كل واحد عارف بيعمل إيه
ساعتين مروا بهدوء وفجأة انفجرت غلاية من الغلايات واتصاب عامل من العمال
الخواجة والعمال جريوا على العامل وبسرعة جابوا عربية علشان تنقله للمستشفى لكن للأسف علشان العربية مش مجهزة مات العامل فى الطريق
الخواجة كوتسيكا حزن جدا عليه .. وبدأ يفكر ازاى الموقف ده ميتكررش لا فى مصنعه ولا فى أى مكان تانى
وكان الحل انه يكون فيه مرفق إسعاف مجهز ، وفعلا استورد الخواجة كوتسيكا أول سيارة إسعاف مجهزة من ألمانيا وكانت بداية تأسيس مرفق الإسعاف
عاش الخواجة “كوتسيكا ” فى مصر لحد ما مات سنة 1962
وكانت وصيته يتدفن فى أسكندرية
وخرج كل المصريين واليونانيين يودعوا راجل حب مصر من كل قلبه









