عصام سامي ناجي
وبكرة الجاي
رافض يجي ويمضي حضور
دروب القلب عطشانة
ومحتاجة لحبة نور
لحلم كبير بيتسكع
ما بين الدور
ما حدش فينا
كده معذور
*
بنتجرع كاسات الخوف
بنبني كعبة للباطل
وبنخلي قلوبنا تطوف
طريقنا ياناس لاهو واضح
ولا معروف
عيونا كمان بتتعامى
ورافضة تشوف
خطاب مكتوب
ومتوقع بدم ألوف
*
وبكرة الجاي
مريض تعبان
بيبدر في الدروب أحزان
فاتح للأنين دكان
وكل ما فيه بيتلون
بلون أسود
كده وزعلان
لا حد في يوم
وقف جنبه
بيرموا عليه
ذنوب ياما
ومن فينا عارف ذنبه
